Auguste Rossignon
Ma
premîre pâre dè bottines dè dîmatche
Dit par l'auteur
Ma premîre pâre de bottines
de dîmatche.
C’atout au début dè 1895, dj’avous
onze ans. Ma foi, ma mère pour fâre coumme tout
l’monde, m’avoyout tous lès djous à la messe en vue
d’fâre ma premîre coumminion. Mais, coumme in faît’
exprès, v’là qu’note mâte d’icole s’avout mins das la
tiète dè nos préparer à cinq pou l’concours d’icoles
primaires au mois d’juin. C’atout la dârinte annâye
què çà s’fayout.
Probablement què nos diridgeants dè
c’t’èpoque-là, s’dijint què lès afants d’pouôves dgens
a sarint toudjous assez pou aller à l’ujine ou bin ète
valets tchûz lès autes. Si bin què pour mi,
l’programme atout assez tchierdgi. Lèvé tous lès djous
à cinq heures pou fâre lès d’voirs et lès l’çons
supplémentaires el tra dès rècrèations et apreu quatre
heures. A ratrant à cinq heures, ma tartine dè blanc
froumatche atout prette et en avant aveu lès deux
vatches à la couôrde pou aller lès souôler el long dès
tch’mins. Et tous lès djous, ç’atout pareil. Quant au
rèche, dj’avous trouvé la combine : arrivé à l’èglise,
el tra qu’lès autes bablottint ou qui pôternint, mi,
djè lîjous deux ou trois couôps ma l’çon et ça y
atout.
Quand el moument d’la cèrèmonie è
approtchi, ma mère èm’ dit coumme ça : on n’tè voit-m’
souvat étudier t’catiéchime, est-ce què tè l’sais
soulmat?
— Oh! èn’ v’a
fayez pont pou ça, c’est n’èst-m’ ça qui m’broûye.
— Das ç’cas-là,
djûdi, tè vèrais tchûz l’père Drèye prenre meseure pou
qu’i t’fayïche èn’ pâre dè bottines vernies à
élastiques.
C’est qu’i faut v’dère què das
c’taps-là, lès afants d’mènetrins coumme mi, pou
l’huvière n’avint qu’ène pâre dè sabots à bridons et
l’èté, dès brodquins qu’on cirout l’dimatche pou aller
à la messe. Quand lès bottines avant étu à la mâjon,
on m’lès è fât essayi. Elles m’allint coumme in gant.
Alors, attention à ti à c’t’heure, pasquè m’n’ami, si
ça n’va-m’ à l’exâmen, tè n’lès arais qu’l’annâye qui
vint.
El djou arrévé dè dèsigner lès
places, v’là qui gn’avout deux premis, et coumme dè
bèn’ entendu, ç’atout l’gachon don tchante et l’aute,
es’ père ermontout la grande houôrlotche et i sinout
la r’traite tous lès djous à neuf heures.
El deujîme, v’là qu’ç’atout mi.
Là-d’sus, djé n’â-m’ ratadu l’rèche. Djè ramasse mès
cliques et mès claques et vè-m’ là vouye tant
qu’dj’avous d’pattes. Mais, en cours dè route, à
r’sondjant à mès bottes, djè m’dis pueuce què çà va
bin et qu’on t’è mènaci, tè pouôrous bin bailli
n’pètite quèvesse à la mère. On dit souvat qu’lès
afants èn’ n’avant-m’ èn’ bounne das la tiète et c’est
bin vrâ. Arrivé das l’ollaye, la mère ratrout dè trâre
lès vatches. Coumme djè fayous lâde mine, elle mè dit
a s’mettant lès pougnes su lès hiètches : oh, rin què
d’voir ta trougne, tè s’rous co bin r’foulé. Das
ç’cas-là, lès bottes restrant à l’aumâre, elles tè
pass’rant zous l’nez. Mais, coumme dj’estimous qu’la
fârce avout assez deurèye, a m’voyant rire, elle è
comprins.
— Alors, el
combin qu’t’es, su quatôrze? T’es bin l’dîjîme?
— Oh! non, mieux
què ç’la, djè sueu l’ deujîme!
— Ah! pouchié,
qu’elle mè dit, tè m’a-n’è bailli ène dè frayeur!
Et mi, là-d’sus, d’lî d’mander :
Alors, lès bottes, djè lès arâ?
— Bin sûr, va...
Et coumme elle m’abrassout, dj’â
aperçu deux lârmes qui lî coulint su la figure. Et dè
m’dère a riant : Et quand t’arais co t’bié costume
aveu ça, tè pouôrais tchanter coumme el Djean Tâbraize
das l’taps :
Ah, lès p’tites bottes vernies,
elles atint si belles, què quand dj’y r’sondge, i
m’sène què dj’lès vois co.
Auguste ROSSIGNON.
Musson, le 11 octobre 1961.
In Annales, Tome II, Cercle
Wallon d’Arlon, 1965, pp. 79-80.
|
